NET ’N NOMMER
SKUINS NÁ die aanvang van die nuwe jaar, met die plofklank van vonkelwynproppe nog vars in ons ore, vertrek ons vroeg op ’n weeksoggend na ’n dorp in die Overberg om by die kantore van Binnelandse Sake ’n paspoortaansoek te gaan indien. Ons dogter is gekeur om vir tien maande as uitruilstudent in Amerika te gaan skoolgaan en haar bestaande paspoort verstryk sowat ’n week voordat sy volgende jaar haar terugvlug sal moet haal, en ’n nuwe aansoekproses was ons voorland.
