Kan ’n werksplek pret wees?
Die tradisionele siening dat iemand wat pret by die werk het, heel moontlik nie gefokus is nie, word deur studies as onwaar bestempel. Pret in die werksplek verhoog produktiwiteit.
Dit is wat Adrian Gostick en die humoris Scott Christopher in hul boek The Levity Effect: Why it Pays to Lighten up skryf. Die outeur Bob Pike, skrywer van The Fun Minute Manager, stem saam. Hy noem dat ’n prettige werksomgewing mense se gemoed verbeter omdat werknemers besef dat hulle waardevol vir bestuurders, die organisasie en vir mekaar is.
’n Navorsingstudie het selfs bevind dat gelukkige werknemers die mededingers met 20% kan klop terwyl ’n gelukkige verkoopspan tot 37% meer transaksies sluit. Dít is genoeg vir enige bestuurder om regop te sit en aandag aan die geluk van kollegas te skenk.
