Kamp in ’n vallei vol vrede
Slanghoek lê sentraal tussen Ceres, Wellington en Worcester, en jy kamp hier tussen wingerde en vrugtebome. Jy staan op welige groen gras, onder koeltebome en langs ’n stroom waarin die takke van wilgerbome rustig heen en weer wieg in die kabbelende water.
Saans hoor jy paddas kwaak en voëls en insekte is volop – pak dus jou gidsboeke, insekweerder en stapskoene in, want langs die Slanghoekstroom gaan jy heerlik kamp en die wêreld verken.
Die oord is net meer as ’n uur se ry uit Kaapstad. Ná die Hugenotetonnel draai jy af van die N1 op die R101 na Rawsonville. Kort daarna gaan jy wéér links draai by die padaanwyser na die Slanghoekvallei, en vir die volgende 10 km ry jy al kronkelend op die teerpad verby Goudini-spa, Jason’s Hill en die Slanghoek-wynkelder tot by die bordjie vir Slanghoek. Jy draai regs en parkeer by die hoofingang, wat so te sê
