Die avonture van Hendrieka IN WONDERLAND
Die oppergodin van die sintuie woon nié in ’n land ver, ver van hier nie. Anders as wat sprokies ’n mens probeer wysmaak, skop dié voorslag al sedert einde 1967 nes in ’n onopvallende straat, agter ’n onopvallende muur, op ’n opvallend vernielde nywerheids-en-boeredorp – in Mpumalanga van alle plekke.
Maar op die sypaadjie buite Hendrieka en Jean-Charles Schmitt se huis is daar tóg iets wat oplettende verbygangers snuf in die neus kan gee, iets wat sê: “Moenie verbaas wees as jy oor hierdie drumpel tree en dan soos Alice in die haasgat weggevoer word na ’n wonderwêreld van kuriositeite nie.”
Hierdie “leidraad” is ’n torinkie, skaars kniehoogte, van vyf klippe wat perfek gebalanseer en sonder enige sement op mekaar gestapel staan, kompleet asof hulle eeue al
