Alle paaie lei na nuwe planne

Dit was net voor sonop toe ek suidwaarts uit Cody in die Amerikaanse staat Wyoming ry. Ek het sleg geslaap, oor weke heen, omdat ek ontuis was by myself en geestelik verlore ná ’n lewenskrisis.

Dié prairielandskap het my laat dink aan Namibië, veral daardie pylreguit klim noord uit die Gariep op pad na Grünau, met tolbosse en hier en daar ’n eensame springbok. Hier in Wyoming was dit net sagebrush (Amerikaanse byvoet) en ’n eensame pronghorn (Amerikaanse takbok).

Daar is iets astraals daaraan om alleen op ’n onbekende langpad te reis: Die kajuit is soos ’n kokon om jou, die landskap abstrak. En toe vang my oog ’n naambord by ’n afdraaipad: Thermopolis – Hidden Paradise. En nét daar draai ek in.

Halfpad deur ’n verlate vallei, die pad