Boekedorp van die Groot-Karoo
Richmond lê díép in die hart van die Groot-Karoo. Dis wydoop wêreld, en met die eerste oogopslag lyk dit na net nóg ’n stil, stowwerige en ietwat verwese Karoodorp. Tog is dit ’n plek wat jy nie op sy baadjie moet takseer nie.
Richmond is naamlik Suid-Afrika se enigste amptelike Boekedorp. Die boekekoors het wel effens afgeneem sedert die dorp in 2007 deur die werk van die deeltydse inwoners Peter Baker en Darryl David dié status bereik en deel geword het van ’n groep plattelandse dorpies reg oor die wêreld wat hulle toewy aan die liefde vir en verkoop van boeke, maar die literêre gees bly deel van die dorp se karakter met die gewilde Boekbedonnerdfees wat steeds elke Oktober hier gehou word. Dan sak boekverkopers, uitgewers, leesliefhebbers en skrywers op die dorp toe – onder die groot geeste wat al ’n draai kom maak het, tel Breyten Breytenbach en Athol Fugard.
NET ’N HANDJIE VOL van die dorp se boekwinkels bly regdeur die jaar oop. “Die boekebesigheid is eintlik maar vir die liefde van die saak,” gesels John Donaldson van Richmond Books & Prints in Loopstraat, die grootste boekwinkel op die dorp. “Dis ’n seisoenale ding wat moeilik is om regdeur die jaar aan die gang te hou.” John, voorheen van Johannesburg, woon al 14 jaar op Richmond en
