Rooiberg Die ‘Lasarus’ van Limpopo
Weet jy hoe ruik ’n naweek – ’n góéie naweek? Op Rooiberg ruik Saterdagoggende soos varsgebakte pannekoek met goddelooslik baie kaneelsuiker.
En dis nié jou snoet wat jou parte speel nie. Buite die ingang van die Rooiberg One Stop woeker vyf op-en-wakker wyse gryses agter die gasplate. Jy kan sien dis ’n liefdestaak wat hierdie spannetjie – almal inwoners van die Avondsrus-sekerheidsoord – al donkiejare met lekkerkry klaarkry: Cor Minnaar, oorspronklik van Pretoria, keer die pannekoeke sommer vyf-vyf op ’n slag uit; sy vrou, Hannetjie, Ludwig Uys en Jannie en Hettie Badenhorst salwe hulle om die beurt ruimskoots met kaneelsuiker; en dan rol Hannetjie of Hettie hulle
