Droogtelesse van veeboere in Namibië
In verskeie dele van Suider-Afrika het die reën reeds vir boere verligting gebring nadat die droogte hulle vir tot sewe jaar uitgemergel het. Ander soek nog verlangend na wolke op die gesigseinder.
Wat duidelik blyk, is die wyse planne wat boere kan maak om te oorleef in toestande waar daar op die oog af nie ’n sweempie hoop is nie. Landbouweekblad het met vier boere van Aranos in die suide van Namibië gesels, ’n streek met normaalweg min reën en waar sommige boere die afgelope sewe jaar feitlik geen reën gekry het nie. Hul omstandighede is tipies van menige ander streek in Suider-Afrika. Baie veeboere kan dus waardevolle lesse uit hul ervaring leer, ongeag waar hulle boer.
BRAAIBRIKETTE
Mnr. Johan Moolman van die plaas Goedehoop vervaardig braaibrikette wat hy na Suid-Afrika uitvoer. Hy het in 2013 begin om houtskool van indringerbosse te maak vir ’n ekstra inkomste. Daar bly egter baie fyn houtskoolstof van 2-15 mm oor wanneer dit gesif word om die groot brokke te skei. Die fyn materiaal is as sodanig nie veel werd nie. Gevolglik maak hy nou brikette daarvan.
Die proses begin by die uitbrand van indringerbosse en -bome om houtskool te maak. Moolman maak nie meer self houtskool nie, maar koop die fyn materiaal by ander
