Só maak jy wins in die Karoo
Verandering is die enigste feit waaroor ’n mens sekerheid het. Om daarby aan te pas, is ál raad vir oorlewing. Dr. Corrie Avenant, met sy een voet in die mediese wêreld en die ander in boerdery as eienaar van die ATKA-stoetery naby Williston, glo die droogte is die nuwe normaal en goeie reën sal net in uitskietjare in die Karoo uitsak.
Daaglikse voer wat party boere tot R3 per skaap per dag uit die sak kan jaag, is weens die droogte ’n noodgedwonge uitgawe vir die meeste Karooboere.
“Die enigste manier om in sulke omstandighede wins te maak, is om met iets te boer wat ons kan bekostig om te voer,” sê Avenant. “Die belangrikste aspek is dat waarmee ons ook al in die Karoo boer, ’n hoëwaardeproduk moet wees om die voerkoste te regverdig.”
Alle diere op Rietfontein, die ATKA-stoetery se standplaas, is dus stoetdiere en het die afgelope paar jaar groot pryse en rekords op veeskoue en veilings behaal.
SKOUPRESTASIES
Die ATKA-stoetery het verlede jaar baie goed presteer op die Royalskou in Pietermaritzburg. “Ons het die opperste kampioenskaapram en -ooi, asook die opperste kampioen-Boerbokram en -ooi geteel. Dit is die eerste keer nóg
