Kragtige tegnologie word nog onderbenut
Grondontleding behoort ’n integrale deel van alle boerderye te wees wat op gewasse, melk, intensiewe veeboerdery of akkerbou konsentreer. Dit is ’n onontbeerlike hulpmiddel om grondtoestande te monitor, bestuursprogramme vir voedingstowwe te ontwikkel en die nodigheid vir byvoegings, soos kalk en gips, vas te stel.
Aangesien kunsmis en verwante produkte groot opbrengsbepalers is en ’n aansienlike deel van die produksiekoste uitmaak, bied grondontleding jou die geleentheid om doeltreffendheid en winsgewendheid te verbeter. Die gesegde lui nie verniet: “As jy nie jou grond toets nie, raai jy bloot.”
Ondervinding toon egter waar grondontleding gereeld gedoen word, word die volle voordeel daarvan in té veel gevalle nie benut nie. Die rede daarvoor is hoofsaaklik ernstige tekortkominge in die proses van monsterneming en -interpretasie.
In hierdie artikel word gekyk na die waarde van grondontleding en hoe belangrik dit is dat die korrekte prosedures gevolg word wanneer grondmonsters geneem word.
