PRETTIGE peutermylpale
1 EK EET SELF
Jou peutertjie se selfvertroue neem vinnig toe en jy hoor ál meer die woordjie “self!” Een van sy eerste treetjies na onafhanklikheid is dat hy daarop aandring om self met ’n lepel te eet, gewoonlik so teen 18 maande oud.
Hoewel ’n peuter die lepel of vurk self wil hanteer (en jy dit ook moet toelaat), het hy steeds iemand nodig wat die lepel doeltreffend met kos kan vul voor hy dit na sy mond bring, sê Madelein Koen, ’n spelterapeut van Rustenburg in Noordwes.
“So verseker jy dat hy wel iets inkry en nie net speel nie.
”Jou peuter is ook nie in staat om self te keer dat die lepeltjie onderstebo draai nie. Hy moet ook nie nét ’n lepel of vurk gebruik nie, maar sy handjies.”
Maak jou maar reg vir ’n gemors, want sy vingers is nog onhandig. Jy sal waarskynlik teen badtyd kos op allerhande vreemde plekke ontdek, soos agter sy ore en tussen sy tone! Maak die lewe makliker deur koerantpapier of ’n plastiektafeldoek onder sy eetstoeltjie
