SEB: Gee armes nou ’n kans
As iemand wat liberale beginsels aanhang, was ek nog altyd daarteen gekant om mense te oordeel op grond van hul ras of velkleur. Ek glo daarin dat ons elke mens primêr as ’n unieke individu moet beskou en nie as ’n afgevaardigde van ’n spesifieke rassegroep nie.
As daar een ding is wat ons almal behoort te leer uit ons verlede, is dit juis dat ons nooit ’n welvarende, inklusiewe en suksesvolle samelewing kan bou op die grondslag van ’n rassebeleid nie.
Dit beteken ook dat ons nooit die verwoestende uitwerking van gister se rasgebaseerde beleid kan regmaak met nóg rassebeleid vandag nie.
