VIR ÁLTYD IN LOCKDOWN
Ná ongeveer ’n maand in lockdown, voel baie Suid-Afrikaners asof hulle hul hare kan uittrek van frustrasie, want baie min van ons het al ooit tevore in ons lewens hierdie tipe inperking beleef.
Vir baie is dit ook ’n tyd van groot angs en onsekerheid en dis duidelik dat nie almal ewe goed by hierdie nuwe normaal aanpas nie. Maar daar is mense vir wie fisieke inperking glad nie iets nuuts is nie.
Só ken Tracy Heine (48) van Nelspruit maar al te goed die realiteit van algehele inperking. Sy is sedert die Paasnaweek van 1998 aan ’n rolstoel vasgekluister nadat sy van die nek af ondertoe verlam is weens ’n motorongeluk. Tracy (toe 26) is sedertdien ’n kwadrupleeg sonder enige
