‘Ek sou al veel vroeër saam met die natuur geboer het’
Drie jaar gelede het groot dele veld van die plaas Zandvlakte in die Baviaanskloof nog pok-geskend gelyk, vandag is dit eilandjies van groen tussen feitlik kaal grond.
Die groen eilandjies is saaddammetjies wat drie jaar gelede oor 20 hektaar se feitlik kaalgestroopte veld gegrawe is om spekboom daarin te plant, grassaad in te strooi en dit daarna met doringtakke toe te pak.
Dit is maar een van vele inisiatiewe om die afgetakelde landskap en plantegroei te herstel. Ander projekte sluit in die rehabilitasie van die Baviaanskloofrivier se vloedvlakte, grootskeepse spekboom-aanplantings en die rehabilitasie van ’n alluviale waaier.
“Zandvlakte se fontein het opgedroog. Ek het besef dat landskapherstel die enigste volhoubare opsie sou wees om die grondwaterbronne weer aan te vul,” sê mnr. Pieter Kruger, eienaar van Zandvlakte.
Met Landbouweekblad se besoek drie jaar gelede het Kruger reeds met die rehabilitasiewerk begin, danksy finansiering én fisieke hulp van onder meer die Nederlandse regering, Living Lands (’n Nederlandse landskapherstelorganisasie wat onder meer in die Baviaanskloof werk), en regeringsprojekte, soos Werk vir Vleilande. (Sien ook “Rig jou boerdery volgens die omgewing”, LBW, 23 Februarie 2018.)
Laasgenoemde het klipmandjies en slikdamme in die hoofkanaal van die Baviaanskloofrivier aangebring om te help met die herstel van die vloedvlakte. In 2008 is 2 000 spekbome per hektaar vernielde veld geplant. Alle vee is
