Herders fnuik roofdiere én bring grondherstel
Die konflik tussen mense en roofdiere is een van die grootste struikelblokke vir veeboere wêreldwyd, maar die Landmark-stigting beweer hulle bied ’n oplossing wat voordelig vir die grond en dierelewe daarop is, én waarmee boere meer vir hul vleis kan verdien.
Die stigting, wat in 2004 tot stand gekom het om die bewaring en etiese gebruik van Suider-Afrika se landskappe aan te moedig, wil die ekonomiese voordele wat uit bewaring voortspruit, ontgin en terugploeg in bewaring.
Die herdersprojek van die Landmarkstigting se Fair Game-inisiatief, genaamd Herding Back Biodiversity, het sedert die ontstaan daarvan drie jaar gelede nog nie ’n enkele lam aan roofdiere afgestaan nie. Dit is te danke aan herders wat gebruik word om die vee op te pas.
Herders word op die stigting se plaas, Kromelboog, naby Beaufort-Wes ingespan. Daar word hoëdrukbeweiding toegepas om die geskiedkundige migrasiepatrone van groot troppe herbivore na te boots, veldherstel
