‘ ’N JONG MAN SONDER GEVOEL’
DIS die slothoofstuk van die Stella-moordverhoor wat die land meer as twee jaar lank aangegryp het. Bo die masker wat hy weens die coronaviruskrisis dra, verklap Xander Bylsma se groen oë so min soos gewoonlik terwyl hy in die beskuldigdebank na die regter se verdoemende woorde luister.
Dan is dit asof die gespanne stilte in die hofsaal hier in Noordwes ekstra gewig aan die vonnis gee: twee keer lewenslange tronkstraf vir die moord op sy eksmeisie Sharnelle Hough (17) en haar boesemvriendin en sy kleinniggie, Marna Engelbrecht (16), in die koshuis van die Hoërskool Stella.
Sharnelle se lyk is die oggend van Saterdag 26 Mei 2018 aangetref waar sy aan ’n trapreling hang.
Marna se lyk was in die badkamer met ’n handsakband om haar nek.
’n Vlaag van emosies spoel deur die hofsaal. Sharnelle se pa, Ronnie Hough, trek sy asem hoorbaar in. Marna se pa, Stefaans, gooi sy arms omhoog asof hy dankie sê dat geregtigheid geskied. Langs hom op die houtbank is ’n groot foto van sy glimlaggende dogter.
Aan die ander kant van die hofsaal is Xander se pa, Monté, se gesig vertrek van woede. Sy gebroke ma, Mercia, hardloop in trane na haar seun waar hy in die beskuldigdebank omgedraai het om na sy ouers te kyk.
Net Xander lyk steeds onverstoord agter sy masker. “Het jy dit gesien? Hy het gelag!” het een hofganger later opgemerk.
Maar daar is nog ’n speler in hierdie emosionele tafereel.
