MUSGRAVE RSA VRYSTAATMODEL .270 WIN – SOOS ’N FENIKS UIT DIE AS
Die ou Grieke het geglo dat as ’n feniks sterf, daar uit die as van die gestorwe voël ’n nuwe een gebore word. Dit het my dadelik aan my Musgrave RSA Vrystaat-model laat dink. Maar wag, kom ek vertel die storie van sy begin af...
Alles het in oom Boetie Agenbag se garage begin waar ek en my twee groot vriende, Boetie Agenbag en Patrys van Niekerk, ’n gedistilleerde sappie genuttig het. So met ons geselsery kom dit uit dat Patrys ’n geweer in .270 Win het – ’n kaliber waarvoor ek op daardie stadium die perfekte gaatjie in my kluis gehad het.
Patrys het die geweer van sy pa, oom Attie, geërf. Oom Attie, op sy beurt, het die geweer in die 1970’s by Federated Timbers in Springbok gekoop. Op my vraag of Patrys nie
