’N LES IN BOSVARKJAG
“Kan jy my hoor?” kom die benoude roep oor die radio. “Praat maar, Andries.”
“Kom kyk hier, die beeste, hulle is baie stukkend!”
By die kamp aangekom kry oom Louis drie van sy Bonsmarakoeie met snywonde aan hul gesigte, kruise en agterbene. “Wat de hel gaan hier aan,” wonder hy?
Hierdie het afgespeel op ’n doodgewone Bosveldoggend in September 2006, op oom Louis Meyer se plaas, Rooiboschbult, in die Sentrum-distrik. Min het ons geweet wat die volgende paar dae, weke en later maande vir ons sou voorlê. Ons gedagtes het behoorlik bontgestaan oor dié onverklaarbare verskynsel.
OP DIE NOODLOTTIGE DAG
Die oggend het soos enige ander normale dag begin. Oom Louis se voorman, Andries, het sy rondtes by die beeste gedoen, waar hy sou sout gooi, kyk of al die krippe vol water is, en die beeste tel. By die eerste trop beeste, vind hy egter drie koeie met snywonde en rapporteer hy oor die tweerigtingradio die verskriklike gesig aan oom Louis.
Oom Louis en Pikkie, my vrou,
