’n Plek waarvoor Covid-19 bang is
Die Karoo bly droog. Van die Boesmanland-vlakte van Calvinia is dit vaal, asvaal. Hoe verder ’n mens noord ry, hoe erger raak die droogte.
Die pad wat voor my lê, is dié vanaf Carnarvon na Vanwyksvlei, ’n 70 km lange grondpad, destyds met weerskante vooruitstrewende skaap- en stoetboerderye. Groot grond en groot ondernemings wat deur die jare grootliks bygedra het tot broodnodige werkskeppingsgeleenthede in albei dorpe. Maar talle van hierdie plase staan nou leeg van mens en dier, verwilder deur die droogte.
Hoe nader jy aan die uitgeteerde vlakte van Vanwyksvlei kom, lê die niks uitgestrek tot baie verder as wat die oog kan sien. Stap die veld in en daar is doodse stilte. Geen skaap of bok wat blêr, geen voëlgesang soos wanneer die veld vrolik pronk nie. Selfs die geharde doringbome is
