Wynbedryf: 2020 een van ergste krisisse nóg
Die wynbedryf het nét begin kop optel toe die Covid-19-pandemie hom soos ’n voorhamer tref. “Dis een van die bedrywe wat die swaarste getref is, veral weens die beperkings om handel te dryf op die uitvoer- en plaaslike mark en die verslegtende ekonomiese toestande regoor die wêreld,” het dr. Tracy Davids, bestuurder van kommoditeitsmarkte en vooruitlesing by die buro vir voedsel- en landboubeleid (BFAP), tydens die virtuele bekendstelling van die buro se vooruitskouing vir 2020 tot 2029 gesê.
Aan die begin van die jaar het dinge heel goed daar uitgesien vir die wynbedryf, wat die afgelope dekade sowat 13% van sy wingerdoppervlakte verloor het.
