Langsamer groei in vraag en produksie verwag
Die melkbedryf handhaaf histories ’n fyn balans tussen vraag en aanbod, en in die volgende dekade sal plaaslike produksie na verwagting voldoende wees om in die vraag te voorsien, sê die buro vir voedsel- en landboubeleid (BFAP) in sy jongste vooruitskouing vir die landbou tot 2029.
Die vlakke waarop die melkprys in dié jare in verhouding tot die mielieprys sal wees, sal na verwagting produksiegroei van gemiddeld 1,8% per jaar ondersteun, sê die BFAP-navorsers.
Melkboere het ’n paar moeilike jare agter die rug, met winsgewendheid wat onder groot druk was omdat die melkprys sywaarts beweeg het en voerpryse deur droogtetoestande opgedruk is.
Mnr. Simon Matthews, melkboer van die Alexandria-omgewing in die Oos-Kaap, wat ’n droëland-kikoejoegebaseerde weidingstelsel het, sê die bedryf is al vier jaar lank onder druk. Hy het 1 300 koeie in melk en hy lewer aan die melkverwerker Woodlands.
