Só kry jy data wat saakmaak

Alles het met grondskanderings begin, maar hulle het gou besef hoewel dit nice inligting oplewer, hulle veel meer besluitnemingsmoontlikhede kan ontsluit as hulle nog ’n paar dinge bysit. Só sê mnr. Jacobus Els, ’n wingerdboukundige en grondwetenskaplike wat in 2018 die landboutegnologiemaatskappy Revolute Systems saam met sy vriend mnr. Berno Greyling, ’n megatroniese en nywerheidsingenieur, by Stellenbosch se LaunchLab op die been gebring het.

Deesdae lyk hul benadering meer soos “’n koek met baie lae”. Hulle het die RevToolbox ontwikkel, wat as sentrale platform vir data-ontleding dien en, belangriker nog, data in aksies omskakel. Die produkte wat tans data aan die RevToolbox voer, is elektromagnetiese grondskanderingstegnologie wat grondverskille uitlig, ’n NDVI-satellietmoniteringsplatform (genormaliseerde plantegroei-indeks) wat groeiverskille aantoon, en vrugtetellingstegnologie wat opbrengsverskille in blokke onder boere se aandag bring.

“Ons probeer tegnologies gedrewe landboukundige data deur afstandswaarnemingstegnologie verskaf, en dit deur ’n platform