Linksom deur die suide
Hierdie roete van bykans 2 000 km kronkel deur vier van Namibië se 14 amptelike distrikte. Jou reis begin by die Nakob-grenspos, 130 km wes van Upington. Volg die B3-hoof-roete tot op Karasburg waar jy proviand kan koop voordat jy kort daarna die teerpad verlaat.
Die grondpad begin by Grünau, ’n piepklein nedersetting in die Karas-distrik met slegs ’n handjie vol huise, ’n vulstasie en ’n hotel met ’n swembad en staanplek vir vier boswaens. Ry weswaarts uit Grünau en volg die C12-grondpad vir 36 km tot op Klein-Karas – ’n gehuggie wat selfs kleiner is as Grünau.
Klein-Karas se mense maak staat op bokboerdery en het onlangs internasionale bekendheid verwerf vir hulle kangal- en anatoliese herdershonde wat die gemeenskap se boerbokke teen luiperds beskerm. Dié honde bevoordeel nie net die boere nie, maar beskerm ook die luiperds teen uitwissing.
’n Treinspoor loop parallel met die grondpad tussen Grünau en Klein-Karas tot by die Holoogberg op die rand van die Ai-Ais-Richtersveld-oorgrenspark, vanwaar die spoorlyn noord swenk Keetmanshoop toe. Draai hier links op die C37-grondpad tot by die Canyon Roadhouse (S27.52481 E17.81521), waar ’n winkel vol aandenkings en snuisterye op besoekers wag, ’n swembad, gastekamers asook 10 staanplekke. Dit is egter die restaurant wat die grootste aftrek kry –die volgende plek waar jy só lekker gaan eet, is eers op Lüderitz, 500 km hiervandaan.
Die daaropvolgende aftrekplek is Hobas – hiervandaan kan jy die Visriviercanyon se uitkykpunt besoek. Volg die goor grondpad – hy’s sinkplaat gery deur derduisende besoekers – vir 11 km óór die Hunsvlakte tot by die rand van die canyon. Dié skeur in die aarde is 160 km lank en naas die
