Wetenskap en praktiese beginsels in perfekte balans
Op dié baanbrekerteler se plaas word die hoogste moontlike vlak van presisieparing behaal. Nietemin skeep mnr. André van der Merwe nie die oog af nie, wat steeds ’n belangrike plek in seleksie het om net die beste beeste volgens rasstandaarde in sy stoetery te gebruik.
Dié boer van Reitz in die Oos-Vrystaat is met die gesogte eerbewys as Molatek, Landbouweekblad en Breedplan se Suider-Afrikaanse Stoetteler van die Jaar vir 2020 op die virtuele Veeskool van die Lewendehawe-registrerende Federasie (LRF) bekroon.
Van der Merwe, sy vrou, Riana, en hul seun, Manfred, boer op die plaas Amanda met hul Wouman-Brangusstoetery. Hulle teel rooi en swart Brangusse en is uitsluitlik stoettelers wat stoetbulle vir hulself en vir verkoop aan ander beesboere teel. Hulle het nie ’n kommersiële beeskudde nie.
Hulle gebruik swart bulle se semen om rooi koeie en verse kunsmatig te insemineer (KI). Dit waarborg swart kalwers, maar verseker ook dat die swart kalf die rooi gene het. Dié nageslag beskik dus oor 50% rooi en 50% swart deelgene.
