Droëland-sojabone klop byna besproeiing
Dit was nie eens met sy gunstelinggewas, mielies, dat mnr. Clinton Frey van Winterton in twee gewas-opbrengskompetisies die botoon gevoer het nie, maar met sojabone.
Clinton se wenopbrengs van 5,12 t/ha was die hoogste vir droëlandverbouing in DuPont Pioneer se Weeg-en-Wen-kompetisie in die hele Suid-Afrika en is net geklop deur die hoogste opbrengs van 5,282 t/ha wat mnr. Tommie Scholtz van die nabygeleë Bergville onder besproeiing behaal het. Clinton het ook die droëlandafdeling in KwaZulu-Natal in Graan SA se Grow for Gold- nasionale opbrengskompetisie gewen.
In Graan SA se kompetisie het net mnr. Japie Breedt van Bapsfontein (droëland, sentrale streek) met 5,29 t/ha en mnre. Willie Dreyer en IG Venter van Viljoenskroon (watertafelgrond) met 5,28 t/ha méér sojabone as Clinton op droëland geoes.
Clinton boer op die plaas Doveton net buite Winterton. Hy produseer mielies, springmielies, sojabone, koring en ertjies, plant dekgewasse en boer met 1 000 kruisraskoeie om speenkalwers te teel.
Die boerdery het sy beslag gekry toe sy pa, Lothar, gedurende die 1980’s aan die Suidkus van KwaZulu-Natal met hoenders begin boer en in 1996 ’n plaas naby Estcourt in die provinsie gekoop het om mielies
