’N BOLANDSE BRUILOF MET ’N ‘BEAT’
ONS ken haar as die vietse oefeninstruktrise in ’n noupassende broek, toppie en praktiese tekkies. Onthou jy die oefenprogram Body Beat, onthou jy háár.
Ook in latere oefenprogramme op die kassie het die fiksheidsghoeroe Linda Kriel Suid- Afrikaners uitasem gelaat nadat sy hulle laat rek, strek, spring of klim het. Maar vandag laat sy die asem op ’n heel ander manier wegslaan.
Met haar gebeitelde figuur in ’n winterwit trourok met vier lae Italiaanse georgette gegiet, maak sy haar verskyning nou op die werf van ’n Bolandse olyfplaas, waar die bruilofsgaste tussen rye suurlemoenbome op die bruid se aankoms wag.
Saam met haar seuns, Zander (24) en Armin (22) Prinsloo uit haar eerste huwelik, stap die 52-jarige Linda haar bruidegom op die maat van Rachel Platten se liedjie “Better Place” tegemoet.
Op 56 staan dr. Adriaan Myburgh, ’n narkotiseur van Kaapstad, op Saterdag 12 Desember vir die eerste keer voor die altaar, maar van trousenuwees is daar geen teken nie. Hy is duidelik ontroer terwyl hy sy pragtige bruid inwag.
