’N JAAR VAN VREES & VREUGDE
DIT is moeilik om te glo die afgelope tyd het vir haar ook angs ingehou – dat daardie uitsaaistem wat altyd so rustig en selfversekerd klink ook soms onsekerheid verskuil het. Maar ja, erken die aanbieder en nuusleser Lynette Francis-Puren (50): Sy het ook in die skadu van covid-19 geleef toe die inperking aangekondig is.
Want sy moes elke dag ateljee toe gaan – vir haar RSG-program, Praat saam, die weeklikse SABC2-aktualiteitsprogram Fokus of om die Afrikaanse nuusbulletin op dié kanaal te lees. Sy was voortdurend bang dat sy die coronavirussiekte gaan opdoen en dit dan oordra aan haar sesjarige dogtertjie, Maya, of ma, Sarah Francis (81), wat by haar woon.
Lynette het daarom oral met handreiniger en maskers rondgeloop.
