MY LETSELS NÁ MISHANDELING

OUBOET wees is ’n belangrike taak, veral as jy drie boeties en ’n enkelma het. Jy voel asof jy moet sorg dat hulle veilig is. Altyd.

Tog het die middeljarige Shane* vyf jaar gelede landuit gevlug, onder meer omdat hy gevoel het hy kan nie sy verantwoordelikheid nakom nie. Nie eens teenoor homself nie.

Meer as 20 jaar nadat ’n kennis hom en ook al drie sy jonger broers in hul skooldae seksueel aangerand het, sny die emosionele letsels van die trauma nog diep.

“Seksuele misbruik neem die gevoel weg dat jy die leier van die trop is. Jy wil net in ’n kokon wees,” sê Shane in ’n Zoom-onderhoud uit die buiteland.

Hy is die oudste seun van die Kaapse ma van haar 10 jaar lange stryd vertel het om geregtigheid vir haar vier seuns te laat geskied.