Die onsinnigheid van die wynverbod

MANIE wil heelhartig saamstem met die argumente wat die netwerkorganisasie Saai aanvoer om te wys hoe onsinnig die verbod op wynverkope is. Die organisasie sê ’n algehele verbod op alle alkohol is die stompste instrument wat die regering kán gebruik om ’n delikate operasie mee uit te voer.

Met die verskoning dat alkoholverbruik tot huismoles, straatgeweld, ongelukke en ander euwels lei wat beddens in hospitale se hoësorgeenhede beset wat vir Covid-19-pasiënte beskikbaar moet wees, mag restaurantgangers nie eens ’n glasie wyn vir middagete koop nie.

Die argument dat ’n alkoholverbod beddens in hospitale beskikbaar maak, hou beslis water.