Boere span saam om aasvoëls te bewaar
Vir talle Oos-Kaapse boere wat met die bewaring van kransaasvoëls (Gyps coprotheres) gemoeid is, was dit ’n blye dag toe ses jong kransaasvoëls wat in aanhouding gebore is, na dié provinsie gebring is vir vrylating in die natuur.
Dié ses aasvoëls is afkomstig van Vulpro, die aasvoëlrehabilitasiesentrum naby die Magaliesberg in Noordwes. Hulle is in November 2020 met die koerierdiens DHL na me. Kate Webster, boervrou van die plaas Rookwood, 35 km buite Komani (voorheen Queenstown), gestuur.
Vir Webster was dit ’n emosionele oomblik om die sestal in ontvangs te neem, want tussen dié klompie is ’n nasaat van Mr G en Mrs V, van die eerste aasvoëls wat Webster in 2004 gered en gerehabiliteer het nadat hulle teen oorhoofse kragdrade vasgevlieg het. Albei se beserings was van só ’n aard dat hulle nooit weer sou kon vlieg nie. Gevolglik is hulle na Vulpro gestuur, waar hulle ’n broeipaar geword het.
’n Broeipaar lê een eier per jaar.
