’n Oase in die Tankwa
Die Tankwa-Karoo is sinoniem met droogte, stof, dorre vlaktes met yl plantegroei en bloedige hitte. Maar op ’n manier is dit juis dié ongenaakbaarheid wat die streek so mooi maak, en daar is beswaarlik ’n beter plek in die land om van die mensdom te ontsnap. As daar tog net ’n lekker rivier iewers was waar ’n mens van die hitte kan ontsnap...
Die goeie nuus is daar ís so ’n plek op die westelike rand van die Tankwa.
Die Mond is waarlik ’n oase in die woestyn, met die kamp op die oewer van die Grootrivier, ’n breë strook water wat deur die droë landskap kerf. Die staanplekke, in die koelte van groot koeltebome, is só ná aan die water dat jy omtrent uit jou tent kan visvang. En
