Damaras diamant in boerderykroon
PLAASINLIGTING
LIGGING: Hopetown
NAAM: Zandraai-boerdery
EIENAARSKAP: Maatskappy
VERTAKKINGS: Damaras, mielies, springmielies, koring, gars, kleinveeveilingslokaal, wild, jag, ekotoerisme (wat wildkyksafari’s, fotografie en kunsaashengel insluit), ’n plaasgastehuis en konferensiegeriewe
GRONDTIPE: Clovelly
VELDTIPE: Karootipe
GEMIDDELDE REËNVAL: 250 mm per jaar
KORTOM
■ Danksy die Damara se voortreflike eienskappe, soos vrugbaarheid, gehardheid, goeie moedereienskappe en tropgebondenheid, is die speensyfer sowat 110%.
■ Die stoetery lê in teling veral klem op rasegtheid, groeivermoë, bespiering en lengte – die basiese eienskappe wat nodig is vir ekonomiese boerdery.
■ Damara-ooie vat ram soos wild en kom op hitte wanneer die toestande gunstig is.
■ Die ooie speen self hul lammers op ongeveer 80 dae en is dan dadelik weer gereed om gedek te word, mits die toestande reg is.
Met ’n boerdery wat tans al die vierde, vyfde en sesde geslag van die Blumenthal-familie op sy werf het, weet mnr. Frank Blumenthal, sy seuns en ’n kleinseun reeds haarfyn wat op hul grond werk en wat nie werk nie. Deur die jare het hulle gevolglik ’n boerdery ontwikkel waarin uiteenlopende vertakkings ten beste werk.
Hul plase is tussen Hopetown en Orania aan die Vrystaatkant van die Oranjerivier geleë. Die boerdery verbou mielies, springmielies, koring en gars onder besproeiing uit die Oranjerivier, wat digby die plaas verbyvloei. Hulle het ook Damara-skape, wat uitstekend daar aangepas is, ’n kleinveeveilingslokaal
