Saffraanproduksie uitgeknip vir Karoo

Wanneer alles in die dorre Karoo onder jou weggeraap word, bly net geloof, hoop en planne oor. “Ek glo nuwe dinge en geleenthede word gebore wanneer iets tot niet gaan,” sê mnr. Eric Brown (39) van Elandsfontein, suidwes van Laingsburg, wat in 2019 sy plaas en hele boerdery naby die ou Karoo-spoorweghalte Konstabel verloor het.

Ondanks terugslae het dié jong boer nie gaan lê nie. Twee jaar later is hy een van die Wes-Kaap se grootste blomkool-, broccoli- en spinasieprodusente. Hy verbou ook botterskorsies.

Brown is vandag ook Suid-Afrika se eerste private kommersiële saffraanboer. Hy gesels geesdriftig oor sy uitbreidingsplanne met hierdie gewas.

Op sy vorige plaas by die Konstabelstasie, met groente en vrugtebome, het misoeste hom bloots gery vanweë die droogte, asook ’n onkunde oor kultivars. Net in 2016 het hy ’n taamlike oes gehad. “In die Karoo is die klimaat altyd die een of ander uiterste, en in 2019 is alles onder my uitverkoop. Ek het met ’n vrou en vier kinders gesit vir wie ek moes sorg. Gelukkig het ek ook besef: Al verloor jy alles, is alles nie verlore nie – hoop, planne en geloof trek jou deur.”