Generasie Z se geldsake

hulle is die generasie wat bedrewe met tegnologie is, dié wat nou in hul twintigerjare is. Jy kan vir hulle vra watter kabeltjie kom waar en wat jy moet doen as jou rekenaar jou ignoreer.

Hulle het ’n toep vir als en van sosiale media kan jy hulle niks vertel nie; inteendeel, hulle besoek selfs TikTok vir raad oor persoonlike finansies.

Tik ’n bietjie #personalfinance op TikTok in en jy sal sien dat daardie video’s al meer as 4,3 miljard keer bekyk is, terwyl #personalfinancetips al 34 miljoen keer bekyk en #personalfinancetok al meer as 7,4 miljoen trefslae het.

Sakhile Mabena het ’n finansiëletegnologie-onderneming, Ofin, wat in gedragsdata-analise, finansiëleprosessering-outomasie en gedragsgegronde finansiering spesialiseer en as iemand wat onlangs self 30 geword het, het hy nog sy vinger op die pols van die generasie.

“Ons gebruik en as kortpaaie tot besluitneming en mense spring so maklik op die lawaaiwa en dink as soveel mense dink iets is reg of waar dan moet dit so wees. Hulle gaan nie self feite na of kyk na die geloofwaardigheid van die mense op hierdie platforms nie. Sosiale media beïnvloed ons besluite of ons dit wil erken of nie. Ek sal nie sosiale media voorstaan as jou enigste bron van finansiële raad nie, daar is net te veel dinge wat verkeerd kan gaan en net te veel mense wat hulle as sogenaamde kenners voordoen.”