EN HOE HET DIT DIE WÊRELD OORGENEEM?
DIS ’n reënerige someroggend in Londen, maar in my kop is ek ’n deelnemer aan die Olimpiese Spele in Tokio. Ek kyk op my foon na beeldmateriaal van hoe die Argentynse basketbalspeler Francisco Caffaro van 2,1 m lank hom in ’n Japannese storthokkie probeer inwurm.
Ek gaan na ’n video van die Britse gouemedaljewenner Tom Daley. Hy duik nie nou nie, maar wikkel sy kop op die maat van Olivia Rodrigo se “Deja vu”. En dan wys die Amerikaanse vlugbalspeler Erik Shoji hoe hy sy teriyaki-aandete in die Olimpiese dorp verorber.
Dis net nog ’n paar sekondes op die video-app TikTok, waar 75 miljoen verskillende video’s om jou aandag meeding. Dié Chinese app het binne net drie jaar uit die niet verskyn en ’n groot dryfkrag – indien nie die grootste nie – in die Westerse kultuur geword.
Onlangs het amper 2 miljard mense TikTok se logo – ’n agtstenoot – om die Euro 2020-sokkertoernooi se velde sien flits – die amptelike borg van dié toernooi. Intussen het miljoene aanhangers om die beurt na wedstryde gekyk en na TikToks van spelers wat dans of sokkerwenke deel.
Dit is ’n reusesprong vir die sosialemediaplatform wat baie mense aanvanklik as “net vir kinders” afgemaak het.
Sedert dit in Augustus 2018 wêreldwyd beskikbaar geraak het, is TikTok al 3 miljard keer afgelaai. ’n Geraamde 1,1 miljard mense in 150 lande gebruik dit daagliks. Dié lande sluit China en Indië uit. China het hul eie weergawe van
