Soos ’n fee verskyn Carina Stander uit die woud diep in die Tsitsikamma waar sy woon. Kaalvoet, in ’n eenvoudige wit rok, en met pasgewaste hare – lank en donkerbruin met spatsels kleur wat in die son glinster. Op die tuinpaadjie wat sy en haar man en twee seuns met hulle eie hande gebou het, kom sy aangestap, byna swewend, tot by die tuinhekkie in die wit paaltjiesheining. Sy glimlag breed, gooi haar hande wyd oop, draai haar kop skuins sodat sy die ruie plantegroei rondom haar betrag. “Welkom in ons wêreld!”
Dit is ’n wonderwêreld van verhale en fantasie en verbeelding wat sy en haar man, Gerrit van Niekerk, en hulle twee seuns, die 14-jarige Aden en 10-jarige Ilan, kom skep het. In die tuin baljaar ape en loeries ongehinderd, so nou en dan maak een van die twee katte, Mooiloop en Avontier (volgens Aden beteken dit “nagtier”), hulle verskyning, en oral in die tuin word ’n mens verras deur blomme, paadjies, beeldhouwerke, knus sithoekies, boomhuise, hangmatte en ’n foefieslaaid.
Binne die dubbelverdieping-houthuis is dit eweneens fantasie wat
