MAKROBOERDERY ONDER MIKROBESTUUR

KORTOM

■ Die Genade-boerdery verbou primêre produkte van gehalte en volg ’n gediversifiseerde boerderybenadering waarin risiko omvattend beperk word.

■ Mnr. Gerhard Bruwer benut die bedingingsmag van Genade-boerdery se skaalgrootte om beter pryse vir produkte en laer insetkoste te beding.

■ Spesialiskundigheid van die onderskeie aandeelhouers dra by tot die suksesvolle bestuur van die groter boerdery.

Mnr. Gerhard Bruwer van Douglas, Noord-Kaapse Jongboer van die Jaar, speel ’n leiersrol in die bestuur van een van Suid-Afrika se grootste familieboerderye wat jaarliks derduisende ton voedsel verbou. Gerhard en sy twee broers aanvaar die verantwoordelikheid van hul afsonderlike eenhede van sowat 2 000 ha besproeiingsgrond wat die groter Genade-boerdery van hul pa, mnr. Vickie Bruwer, uitmaak. Gerhard boer in die Douglas-gebied (grondbone, aartappels), Vickie jr. in die Schmidtsdrif-gebied, en Hannes by Hopetown (uie en springmielies).

Koring, gars, kommersiële mielies, lusern, uie, pekanneute, druiwe en ’n beesvertakking maak deel uit van die sowat tien gediversifiseerde produksievertakkings van die groter boerdery. Die produksie en ander kwessies word maandeliks op ’n familievergadering bespreek.

Benewens die algemene verpligting teenoor hul eenhede, het elkeen ’n spesialistaak. Vickie jr. vervul die rol van ingenieur wat na die werktuie