AL DIE TALENTE IN EEN LYF
SY WAS net ses jaar oud toe haar pa al spog sy jongste is “baie lewendig en slim en wil net heeldag werk, werk, werk…’’ En onlangs, 15 jaar nadat Ian von Memerty, bekend as Suid-Afrika se “woordeboekdefinisie van showbiz” sy dogter Kasvia so aan Huisgenoot beskryf het, het sy voor ’n wêreldwye TV-gehoor van rugbykykers gewys die appel val nie ver van die boom nie.
Sy het nie net pa se kuiltjiesglimlag en ma Vivienne, ’n gewese baldanskampioen, se skoonheid geërf nie, maar ook hul verhoogtalent en waagmoed.
Toe SA Rugby haar bel en sê hulle soek iemand om die landslied by die toets teen die Poemas in die Nelson Mandelabaai-stadion te sing het sy nie gehuiwer nie. Wil sy ’n kandidaat wees?
“Ek het vir hulle gestuur. En ’n paar dae later bel hulle my weer: Die werk is myne,” vertel Kasvia (21) uit haar tuisstad, Gqeberha.
