Plaasverkope
MARKNEIGINGS
GRONDPRYSE TEL KOP OP NÁ DROOGTE
In die TABEL is ’n opsomming van grondtransaksies groter as 10 ha in die Oos-Kaap vir die 12 maande tot Augustus vanjaar.
In dié tyd is 305 ooreenkomste in 34 distrikte gesluit. Die sluit van aktekantore vanweë covid-19 verlede jaar het vergelykende neigings vir die provinsie bemoeilik. Altesame 164 444 ha is teen R1,854 miljard verhandel. In 14 van die distrikte (41% teenoor 51% die vorige jaar) is dalende prysneigings waargeneem. Ná die ernstige droogte lyk dit asof grondpryse in groot dele van die provinsie stabiliseer.
Pryse het goed gestyg by Albanie (12,6%), Barkly-Oos (21%), Graaff-Reinet (11,8%), Jansenville (14,5%), Qonce (13,2%), Tarkastad (14%) en Uniondale (16,5%). By Elliott (-10,7%), Komga (-21,8%) en Maclear (-11,5%) het pryse met meer as 10% gedaal.
Transaksieverhandelings ten opsigte van plaasgrootte lyk soos volg (met verlede jaar se syfer tussen hakies): kleiner as 50 ha, is 27% (23%); 50-150 ha, 12% (14%); 150-300 ha, 11% (15%); 300-450 ha, 13% (13%); 450-600 ha, 8% (13%); groter as 600 ha, 28% (28%).
Statistieke vir ál die provinsies is op Landbou.com beskikbaar, asook meer besonderhede, soos wie die transaksies aangegaan het. Klik op Plase/Grond-oudit. Dit behels:
■ Statistieke.
■ Besonderhede oor alle plaasverkope binne ’n distrik.
Die onderstaande oordragte van plaaseiendomme is deur aktekantore geregistreer (plaasnommer tussen hakies).
