Die toekoms is (Riversdal) groen

Dis Augustus en die landskap rondom Riversdal is so groen soos die girtsgroen bakkie wat voor Suid-Kaap Verf se winkel staan. Met die ry na dié dorp langs die N2 is die landskap hipnoties. Na die noorde lê die waasblou Langeberg, en na die suide golf die groen koringlande onsigbaar afdraande in Stilbaai en Vermaaklikheid se koers.

Buiten koring, gars en lusern is die ander gewas wat ’n mens maklik kan eien nie groen nie, maar John Deeregeel: kanola. Die goeie landbougrond en relatief hoë reënval (die streek ervaar ook sporadies die knyp van droogte) is goed vir boerdery. Merinoskape oortrek soms ’n landery soos ’n skare kakiebruin miere, Fries- of Jerseykoeie dui ’n melkery aan, en soms dop ’n onverwagte kampie volstruise uit.

Vandag gaan ek die dorp verken, maar eers wil ek