NÓG VREUGDE MET BABA NO. 2
‘EK VOEL SOOS DIE MEES GESEËNDE, GELUKKIGSTE VROU OP AARDE. AL MY DROME HET WAAR GEWORD’
DIE bedrywige krulkoppie se gesiggie is die ene verwondering terwyl sy met groot, nuuskierige oë kyk hoe haar ma se blonde lokke gestileer word.
“Myne ook!” roep die kleinding opgewonde uit en gryp na die twee stywe bollatjies op haar kop. “Ek wil ook!”
Dis oomblikke soos dié wat haar herinner hoe kosbaar ma-wees vir haar is, sê die aktrise Reandi Grey, klein Heidi (2) se trotse ma. En nou sien sy en haar man, Dewald, daarna uit om vroeg in die nuwe jaar nog ’n kindjie in hul huis en lewe te verwelkom.
“Ek’s vyf maande swanger,” deel sy die nuus eksklusief met Huisgenoot. “Heidi gaan ’n sussie kry, en ons kan nie blyer wees nie.”
Al is die klein woelwater ook opgewonde oor die nuwe baba, stel sy op die oomblik meer belang in die haarverlengings wat sy duskant die grimeertafel raakgesien het. Haar ogies vonkel toe sy haar handjies met die haarstukke na haar ma toe uitstrek.
“Kyk net hoe mooi lyk jy,” sê Reandi (32) terwyl sy die verlengstuk aan haar dogtertjie se krulle vasknip.
Die “klein aktrisetjie”, soos haar ma haar al klaar noem, gooi haar lang poniestert teatraal oor haar skouer, maak ’n draai in die
