PLAN C
“Wat is die plan?” Ek weerstaan die drang om druipstert in die motorhuis te gaan werk soek en besluit om nou maar my man te staan. “Uhm. Ja wel, ek het gedink om ‘n interessante roete deur die Noord-Kaap aan te pak en dan deur die Oos-Kaap terug te keer na Kaapstad. Ek skat ons sal so drie, vier dae op die pad wees – dalk meer…”
Die stilte is tasbaar en heeltemal te lank. Die Prof (vir dié van julle wat nie weet nie, ek was braaf genoeg om ‘n vrou te trou wat slimmer as die gemiddelde persoon in die wêreld is!) is tussen Zoom vergaderings waar daar ongetwyfeld onderwerpe vêr bo my vuurmaakplek bespreek word. “En waar beplan jy om te oornag?” blaf sy, steeds nie oortuig nie. “Uhm. Ja wel, ek het gedink ons kan sommer so in die ry kampplek soek of wat ookal…”
Hierdie gesprek gaan nie goed nie… “Kyk, as jy wil hê ek moet lang dae op pad in ‘n kar spandeer, wil ek in ordentlike plekke bly. Met storte!” Goed dan. Dit is dan nou so – die baas het gepraat. “En ek hoop ons ry in ‘n gemaklike motor…” sê sy voordat sy weer haar oorfone opsit vir die volgende vergadering met ander geleerdes.
Nie dat sy nog luister nie, maar daar is ten minste goeie nuus oor die laaste saak. Jaguar Land Rover het uiteindelik een van hul nuwe Defender 90’s vir ons beskikbaar gestel en ek is erg opgewonde om agter die stuur van dié heeltemal herontwerpte ikoon in te skuif. Andrew St. Pierre White het die nuwe Defender 90 uitmekaar getrek en die herontwerp ‘n massiewe teleurstelling genoem. ‘n Voormalige kollega was skepties en het gesê dit het omtrent dieselfde as-artikulasie as ‘n skaatsplank. Ek dink egter die oulike kortgat kan ons dalk verras (wel, na die pas afgelope gesprek hoop ek vir seker so!). Gelukkig kry ons die 240 S met staalwiele, stewige Wrangler veldrybande en die sogenaamde Explorer Kit.
My plan, soos gewoonlik met nie veel detail nie, is om op ‘n redelike wye sirkelroete na ‘n paar afgeleë dorpies in die Noorden Oos-Kaap te besoek. Toevallig begin meeste van die dorpe met ‘n “C”
