Versorg jou huis weg van die huis af
Ek is ‘n gereelde kampeerder en versorg my toerusting goed, maar het onlangs skade gely nadat ek ‘n daktent buite my motorhuis gestoor het. ‘n Plaag rotte het hulself tuisgemaak in my tent en dit is heeltemal vernietig. Dié groot skade het my laat dink aan die beste maniere om jou huis weg van die huis te versorg, vir daardie periodes wat jy wel by die huis is. Hiermee dan ‘n paar voorstelle wat jou op die lang duur heelwat geld kan bespaar en selfs jou vakansie kan red.
Versorging na jou avontuur
Voordat jy jou sleepwa/karavaan wegbêre, moet jy nadink oor jou mees onlangse reis. Het jy deur water of diep modder gery? Indien wel, is dit ‘n goeie tyd om die wiellaers na te gaan aangesien water moontlik by die seëls verby gesypel het en in die laers gekom het. Sou jy die sleepwa/karavaan in hierdie toestand stoor, kan jy bes moontlik ‘n stewige herstelrekening verwag wanneer jy dit weer wil gebruik. Nog erger, jy kan skade op jou volgende reis teëkom wat nie net gevaarlik is nie, maar baie vinnig jou vakansie kan bederf.
