Meesterplan broodnodig om suikerbedryf te red

Suid-Afrikaanse suikerboere verbou jaarliks sowat 19,8 miljoen ton suikerriet op 362 000 ha in KwaZulu-Natal en Mpumalanga. Twaalf meulens verwerk dié suikerriet tot 2,1 miljoen ton suiker. Anders as die meeste suikerproduserende lande reg oor die wêreld, ontvang Suid-Afrika se 21 776 geregistreerde suikerrietprodusente – waarvan 20 631 kleinskaals is en elk jaarliks tot 1 800 ton produseer – min of geen formele produksieof bemarkingsubsidies nie.

Mnr. Trix Trikam, uitvoerende direkteur van die Suid-Afrikaanse Suikervereniging (SASV), sê ten spyte hiervan, en miskien selfs as gevolg hiervan, is Suid-Afrika se primêre suikerrietwaardeketting van die koste- en produksiedoeltreffendste ter wêreld. Dit word gerugsteun deur ondersteunings- en navorsingsinstellings van wêreldgehalte. Buiten die SASV, ’n oorkoepelende vereniging wat Suid-Afrika se oorskotsuiker uitvoer, ondersteun die Suid-Afrikaanse Suikerrietnavorsingsinstituut, SA Canegrowers en die Suid-Afrikaanse Boereontwikkelingsvereniging produsente. Die Suid-Afrikaanse Suikermeulenaarsvereniging sien om na meulenaars