SPAAR ÉN SMUL
“Ek is nou al so sterk ek kan ’n R1 000 se groceries in een hand dra!”Dié grappie laat ’n mens lekker lag, maar eintlik is dit ’n refleksie van hoe duur kos geword het en hoe ’n mens soms by die till in koue sweet uitslaan soos die total klim. En dan stap jy net met een of twee sakke groceries by die winkel uit.
En nou is dit weer daai tyd van die jaar waar jy yster met jou hande moet breek om jou begroting te laat klop sodat jy kan byhou by al die feestelikheid! Kenners en studies is dit eens – ons salarisse kan eenvoudig nie byhou by die inflasiekoers nie en ons moet alles in ons vermoë doen om ons rande te rek.
