Desperaat en wanhopig
Terwyl ons steeds probeer vrede maak met Shawn (Deànré Reiners) se skielike dood in Desember, maak sy pa, DeWet Basson (Dirk Stoltz), reeds planne om sy seun se dood te wreek.
Hoewel hy nie doodseker is wie vir sy verpletterende verlies verantwoordelik is nie, wil hy iewers begin – in dié geval, met die Welmans.
“Hy het ’n vermoede die Welmans steek iets weg,” erken Dirk. Maar konkrete bewyse is nodig voor hy teen sy seun se moordenaars kan optree . . .
AFGELUISTER
Dirk, wat gretig is om sy wraakplan op dreef te kry, sê sy karakter doen dit waarmee hy goed is: Hy snuffel rond vir inligting. “Uiteindelik plant hy meeluistertoestelle in die Welmans se huis,” onthul die akteur.
Maar sy komplot om op Chris (David Rees) (Deirdre Wolhuter) te spioeneer, val binne enkele ure plat nadat die Welmans snuf in die neus kry van die meeluistertoestelle. Maar dis nie heeltemal verniet nie, want een van die paar gesprekke wat DeWet afluister, wys in die rigting van Switserland – die plek waar (André Lötter), die man wat Shawn per ongeluk doodgemaak het, wegkruip!
