#1 ’n Tafel vol vetties
Dié ou staaltafel is vir Mandy Crooks van Dargle in KwaZulu-Natal perfek om haar vetplante op uit te stal. Die kleure, vorms en teksture van die vetplante komplementeer mekaar, en sy kan dié geharde plante los dat hulle op hul eie aangaan. “Vetplante verg min onderhoud en het nie baie fiemies nie. Hoewel ons klimaat nie ideaal is vir vetplante nie, floreer dit hier. Ons kry meer reën as wat die plante nodig het; soms ook ryp in die winter en hael in die somer,” vertel sy. “Maar solank die dreinering goed is, is die vetplante gelukkig. En die koue temperature van ons winters bring die blare se kleure op hul mooiste uit.”
#2 Sonénskadu
Dié pottetafel staan op Karin du Plessis se stoep in Franschhoek. “Die hoek was kaal en oninteressant en het hoogte gekort,” vertel sy. Dit is ook maklik bereikbaar om nat te gooi en hier kan ek heerlik speel met kleurvolle eenjariges en plante wat ek in verskillende vorms snoei. Bo-op die tafel is die sonliefhebbers en op die onderste rak floreer skaduplante.