![f0022-01](https://article-imgs.scribdassets.com/5y2jf6x1fkaas13t/images/fileOVKOZNVJ.jpg)
Sedert die geboorte van hierdie tydskrif, sowat twee jaar gelede, het ek en my pa Gonarezhou stewig in ons avontuur-visier gehad. Dit was nog altyd een van daardie “eendag”-uitstappies en alhoewel uiters opgewonde, was ons baie versigtig met die beplanning van hierdie epiese avontuur.
Die eerste groot probleem was om akkurate en opgedateerde inligting oor Gonarezhou en die omliggende gebied te vind. Ek het dus die groot kanonne uitgehaal en ons ou reisboeke afgestof om op te lees oor die “plek van die olifant” en het ure by my oupa deurgebring om oor sy reis na die park, sowat twee dekades gelede, te leer. Die terugvoer van beide my oupa en die reisboeke het my uiters skepties oor Gonarezhou gemaak, aangesien albei bronne dit as ‘n dorre woestyn-land, wat deur stropery en korrupsie geteister is, beskryf het.
Is dit ooit die moeite werd om te besoek, het ons gewonder…? Daar was egter geen omdraaikans nie, want die reis was bespreek, die Jimny propvol gepak en, te midde van een van die koudste winters wat Gauteng die afgelope jare gesien het, was ons op pad.
Ons val in die pad
Ons het die konvooi by die Petroport op die N1 buite Pretoria ontmoet. Ons reisgeselskap het bestaan uit ek en my pa in Opposite Lock se toegeruste Jimny, Coba en Darrel van Opposite Lock in hul splinternuwe 4.2-liter Land Cruiser 79, Kenneth en Ti-Amore in hul 4.5 V8 Land Cruiser genaamd Gunnland (vind hulle op Instagram: @gunnland79), Kenny van CGear in sy Volkswagen 4Motion V6 Amarok en, uiteindelik, ‘n bekende gesig: Jaco van Affipadaf in sy nuwe Amatrokkie (‘n pasgemaakte Amarok 2.0 TDI 4x4). Die groep was gretig om hierdie avontuur van ‘n leeftyd aan te pak, almal se opgewondenheid tasbaar in die lug.
Ons eerste bestemming was die pragtige Mapungubwe Nasionale Park, slegs 70km vanaf Musina en die Zimbabwe-grens. Ons het omstreeks 17:00 by die ontvangs van die park aangekom – net betyds vir die Bokke om teen Wallis af te skop vir die beslissende toets in Kaapstad. Ek het onmiddellik binne die Jimny na RSG oorgeskakel om op pad na ons verblyf, Tshugulu Lodge, na die eerste helfte van die toetswedstryd te luister. Handré Pollard het pas deur die Wallisverdediging geskiet vir die eerste drie en terwyl ons in die motor feesgevier het, het ek ‘n groot kat voor ons