Groente kan jy teoreties kweek op enige plek waar daar sonlig is. Die kleinste oppervlak – van ’n balkon of vensterbank tot ’n paar potte by jou agterdeur – sal deug. Trouens, hoe kleiner jy begin, hoe minder oorweldigend sal die hele projek voel, en hoe kleiner sal die verliese natuurlik wees in die geval van ’n misoes.
Sedert die publikasie van ons praktiese groenteboek, Begin jou eie groentetuin (sien oorkantste blad), hoor ons van lesers wat ná net een rampsalige seisoen in die groentetuin vir altyd die handdoek ingooi, baiemaal omdat hulle oë groter was as hulle maag. Ons was presies dieselfde die eerste jaar of twee, maar jy leer mettertyd wat glad nie groei nie of erg aangeval word deur peste. En jy maak vrede met die feit dat net kruie in die hoogsomer op Koringberg floreer. Die ander gewilde vraag wat opduik in lesersbriewe, dikwels ook ná ’n misoes, is: Is dit regtig goedkoper om jou eie groente te kweek?
Ons ondervinding is dat beginnergroentetuinmakers dikwels eerder uit die veld geslaan is oor hoeveel tyd, toewyding en geduld – eerder as geld – ’n kostuin van ’n mens verg. Tog vis die ongelowige Thomasse gewoonlik met die intrapslag uit of hierdie belegging “realisties gesproke… in terme van tyd
