Soos jy dieVanderkloof-dam uit die noorde nader – Bloemfontein oor, dan Koffiefontein en Luckhoff – split die pad omtrent 1,6km voor die damwal. As jy regs draai, ry jy met ’n brug oor die Oranje-rivier vanwaar jy ’n uitsig het op die damwal stroomaf. As jy links hou, ry jy 107m bo die rivier oor die hoogste damwal in die land.
Op die damwal steek ’n mens ook die grens oor tussen die Vrystaat en die Noord-Kaap, met die dorpie self wat net-net in Kaapland lê.
Die Vanderkloofdam het verlede jaar van die vroegsomer tot vanjaar in die laatherfs oorgeloop. Hierdie massa water in die droë landskap betrap ’n mens heeltemal onkant. Dit is ’n ware oase in die Bo-Karoo, bespikkel met kaktusse en struike en berge wat jou van die wêreld afskerm.
By die ingang van die dorp ry jy om ’n groot sirkel met kleurryke rotskuns in die middel: ’n reuseblom wat met rooi-en geelgeverfde klippe uitgepak is. Bennie Liebenberg het die projek begin kort nadat sy vrou, Thirza, in 2017 aan kanker oorlede is. Dit was haar idee om
